Benvidos a este novo curso 2016-2017

Benqueridos amigos e amigas, compañeiros, familias e alumnos, estamos xa de novo comezando unha nova singradura. Unha singradura que será diferente, porque nós non somos os mesmos que o curso pasado, porque temos compañeiros e familias novas ao noso carón, porque todos nosos imos medrando e cambiamos con cada encontro que acontece na nosa vida. Si, na nosa VIDA, porque este curso queremos descubrir a vida, construír vida e agradecer a vida, como veremos no lema e nos carteis para os nenos e nenas de Educación Infantil e Primaria. Os da ESO reflexionarán sobre “a súa vida”, unha vida na que se pode crear, subir ou sexa mirar máis aló tendo exemplos de xente comprometida, compartir e celebrar. Porque a nosa vida é isto e moito máis. Este curso imos compartir vida, a vida que rebule con moita forza en cada neno e nena que está a medrar e que está a descubrir o mundo, en cada familia e educador ou educadora que acompaña desde o seu rol esa vida que está formándose e precisa apoio, orientación, cariño e moita dedicación.

Diante de nós temos nove meses que nos van deparar infinidade de experiencias e oportunidades nas que compartir a nosa vida. Estás convidado a vivila a tope, a compartila coas persoas que formamos parte da Comunidade Educativa dos Salesianos de Lugo. Non teñas medo, pois incluso podes vivir a túa vida de fe para descubrir que en Deus temos “vida en abundancia”. Atrévete! Pois queremos que a nosa escola e a nosa casa salesiana de Lugo sexa un fogar onde compartir vida e amor, como nos pide o noso Reitor Maior, Don Ángel Fernández Artime.

Parafraseando unhas palabras de Madre Teresa de Calcuta, convídovos a que descubramos que a vida é... unha oportunidade que temos que aproveitar; é beleza que temos que admirar; é un soño que temos que facer realidade; é un reto que temos que afrontar; é un don precioso que temos que coidar; é un misterio que temos que desvelar; é unha aventura que temos que enfrontar; é vida que temos que defender.

FELIZ CURSO A TODAS E TODOS!